El Boletín Oficial del Principáu d’Asturies (BOPA) publicó'l día 20 de xineru dos convocatories de subvenciones destinaes a impulsar la normalización social del asturianu y del eonaviegu, con una dotación global de 230.000 euros. Dambes llinies d'ayudes van concedese en réxime de concurrencia competitiva y reforcien el compromisu del Gobiernu d’Asturies pa cola promoción y dignificación de les llingües propies del Principáu.

Subvenciones pa empreses y entidaes ensin afán d'arrequecimientu

La primer llinia d'ayudes cunta con un presupuestu de 120.000 euros y diríxese a empreses privaes, fundaciones y asociaciones que desenvuelvan proyectos d'interés cultural, llingüísticu o social n'asturianu o eonaviegu. D'esta cuantía, 70.000 euros destínense a proyectos promovíos por empreses y 50.000 euros a iniciatives d'entidaes ensin afán d'arriquecimientu. Ente los criterios de valoración tán la corrección llingüística, l'interés cultural y social, la capacidá de divulgación, la esperiencia de les persones responsables, la innovación, la perspectiva de xéneru y la vinculación col mediu rural.

Sofitu a los medios de comunicación

La segunda convocatoria, dotada con 110.000 euros, ta dirixida a empreses titulares de prensa, radio, televisión o medios dixitales d'ámbitu asturianu. L'oxetivu ye financiar inversiones destinaes a la producción de conteníos n'asturianu o eonaviegu que contribuyan al so usu habitual n'informaciones xenerales, espacios periódicos o programes d'interés especial, siempre dientro de les canales propies del mediu y asumíos editorialmente por esti. Van poder optar a estes ayudes empreses privaes con domiciliu social, establecimientu o delegación nel territoriu asturianu.

En dambos casos, el plazu de presentación de solicitúes ye de 20 díes hábiles, acabando'l 17 de febreru. Tola información detallada, amás de los formularios normalizaos de solicitú, pue consultase na sede electrónica del Principáu d’Asturies:

Medios de comunicación: https://miprincipado.asturias.es/-/dboid-6269000006042232707573

Empreses privaes: https://miprincipado.asturias.es/-/dboid-6269000113735787007573

Asociaciones y fundaciones: https://miprincipado.asturias.es/-/dboid-6269000113735922807573 

Con estes convocatories, l’Executivu autonómicu afianza la so política de sofitu a la normalización llingüística, fomentando la presencia del asturianu y del eonaviegu nos medios de comunicación y en proyectos culturales, sociales y empresariales que reforcien el so usu social, favorezan la so tresmisión interxeneracional en dellos ámbitos de la vida de caldía y contribuyan a la so proyección de futuru.