La conseyera de Cultura, Política Llingüística y Deporte, Vanessa Gutiérrez, entregó ayeri'l XVII Premiu Camaretá al Meyor Cantar al músicu Ferla Megía nel
Teatru Vital Aza de La Pola (Ḷḷena).

El certame ta dotáu con 6.000 euros y reconoz añalmente la creación musical n’asturianu y eonaviegu, y nesta edición contó con Héctor Braga, Herbamora, Lïbre y Ferla Megía como finalistes. La gala, cuntó tamién col conciertu de La Bonturné, el grupu ganador de la pasada edición col tema Odisea la nuí.

El xuráu seleccionó a Ferla Megía  ganador d'esta edición con Xatu , cantar que forma parte del so EP Páxaros 01.  L'artista, una de les voces más inquietes de la escena actual y que fusiona soníos urbanos y tradicionales, va formar parte agora del circuitu Autores nel Camín, que promueve actuaciones en distintos conceyos dientro del programa Asturies, Cultura en Rede.